Бишкек мэриясынын жаңы имараты 9 кабаттуу болот
Бишкек мэриясынын жаңы имараты тогуз кабаттуу болорун бүгүн шаардык кеңештин муниципалдык менчик, жер маселелери, шаар куруу жана архитектура боюнча туруктуу комиссиясынын жыйынында маалымдалды.
Капиталдык курулуш башкармалыгынын өкүлдөрүнүн айтымында, жер алдындагы бөлүгүндө эки деңгээлдүү унаа токтотуучу жай каралып, ал алдын ала эсеп боюнча 80 автоунаага ылайыкталат.
Жаңы имаратка кайсы түзүмдөр жайгаштырылаары тууралуу кеңири маалымат депутаттарга берилген жок. Аткаминерлер долбоор дагы такталып жатканын белгилешти.
Буга чейин Киев көчөсүндөгү азыркы мэриянын имаратынын жанындагы жабык унаа токтотуучу жайдын ордунда жаңы административдик имаратты куруу үчүн даярдык иштери башталганы кабарланган.
