Коргоо министрлиги Кант шаарындагы аскер шаарчасын мэрияга өткөрүп берүүгө даяр
Коргоо министрлиги Кант шаарындагы аскер шаарчасын шаар мэриясынын балансына өткөрүп берүүгө даяр экенин коргоо министри Руслан Мукамбетов Жогорку Кеңештин жыйынында билдирди.
Депутат Бакыт Тентишев бул маселени чечүү зарылдыгын белгилеп, негизги көйгөй от казандын абалына байланыштуу экенин айтты.
"Мен тургундар менен жолугуп, эмне болуп жатканын сурап жатам. Айрымдары Коргоо министрлиги өткөрүүдөн баш тартып жатат дешсе, башкалары мэрия кабыл албай жатат дешет. Акыры ким баланска алгысы келбей жатат? Маселе эмнеде?" — деп суроо узатты ал.
Министр мекеме аскер шаарчасын эртең эле өткөрүп берүүгө даяр экенин айтты. Анын айтымында, маселе каржылоодо — от казанга кошумча казан сатып алуу зарыл, бул болсо ири каражатты талап кылат.
Депутат мэрия от казан оңдолмоюнча шаарчаны баланска ала албай турганын билдирди, анткени бул жергиликтүү бюджетке кошумча чыгым жаратат.
Ошондой эле ал буга чейин тургундардын бир бөлүгү көчүрүлгөнүн, бирок көйгөйлөр дагы эле чечилбей жатканын кошумчалады. Парламентарийдин айтымында, аскер шаарчасынын инфраструктурасы канааттандырарлык эмес абалда: үйлөр 1960–1970-жылдары курулган, аймак көрктөндүрүлгөн эмес, балдар жана спорт аянтчалары оңдоого муктаж, ички жолдор бузулган.
Депутат маселени каржылоо жагынан чечүү үчүн Министрлер кабинетине кайра кайрылууну сунуштап, шаарчаны муниципалитетке техникалык көйгөйлөрү чечилген абалда өткөрүп берүү зарылдыгын белгиледи.
