Россия элчиси "Кант" авибазасын кеңейтүүнүн зарылчылыгы жоктугун билдирди
Россиянын Кыргызстандагы авиабазасынын учурдагы параметрлери ЖККУга мүчө мамлекеттерге карата болгон коопсуздук коркунучтарына жооп кайтаруу үчүн жетиштүү, аны кеңейтүү зарыл эмес. Бул тууралуу Россиянын Бишкек шаарындагы Атайын жана Ыйгарым укуктуу элчиси Сергей Вакунов билдирди.
Анын айтымында, тиешелүү адистердин баамы боюнча авиабазанын учурдагы иштөө параметрлери бирикменин мүчө мамлекеттеринин коопсуздугуна түштүк багыттан келип чыгышы мүмкүн болгон коркунучтарды алдын алууга толук жетиштүү.
Дипломат Кыргызстан аймагында жайгашкан аскер кызматкерлери коюлган милдеттерди ийгиликтүү аткарып жатканын белгиледи. Алар кыргызстандык күч түзүмдөрүнө экстремизм, терроризм, баңги заттарды мыйзамсыз жүгүртүү жана уюшкан кылмыштуулукка каршы күрөштө көмөк көрсөтүшөт. Ошондой эле ЖККУга мүчө башка өлкөлөрдүн бөлүктөрү менен биргелешкен операцияларды жүргүзүүдө өз ара аракеттенүүнү машыгышат. Атап айтканда, өткөн жылдын сентябрында Ысык-Көл облусунда өткөн "Рубеж-2025" командалык-штабдык машыгууларын даярдоого жана өткөрүүгө активдүү катышкан.
Сергей Вакунов Россия Федерациясы объектти заманбап курал-жарак, аскердик техника жана жабдуулар менен камсыз кылууга мындан ары да өзгөчө көңүл бурарын кошумчалады.
Ал ошондой эле республиканын жетекчилигинин кайрылуусуна жооп катары, эл аралык террористтер Афганистан аймагынан кол салган татаал мезгилден кийин түзүлгөн Кант жана Каракол шаарларындагы бириккен россиялык авиабаза 20 жылдан ашуун убакыттан бери өлкөнүн коопсуздугун камсыздоодо жана аймактагы ЖККУнун Ыкчам жайгаштыруу күчтөрүнө аба аркылуу колдоо көрсөтүүдө негизги роль ойноп келатканын эске салды.
