Жалал-Абадда 6,7 млн сомго мөмө-жемиш сактоочу кампа курулду
Жалал-Абад облусунун Базар-Коргон районундагы Жаш-Ленин айылында мөмө-жемиш жана жашылча сактоочу логистикалык борбор курулганын Суу ресурстары, айыл чарба жана кайра иштетүү өнөр жайы министрлиги билдирди.
Маалыматка ылайык, кампа муниципалдык жер тилкесине курулуп, 2024-жылы CASA-1000 долбоорунун алкагында жергиликтүү жамааттарды колдоо максатында кошумча каржылоонун эсебинен ишке ашырылган.
Долбоордун алкагында 6 млн 644 миң 663 сом бөлүнгөн, ал эми жергиликтүү бюджеттен 104 миң сом каралган. Кампанын жалпы сыйымдуулугу 200 тонна продукцияны түзөт.
Курулуш иштери 2024-жылдын 26-апрелинде башталып, учурда толугу менен аяктап, объект пайдаланууга берүүгө даяр.
Министрликтин маалыматына караганда, кампа айыл чарба продукциясын сактоо үчүн арналган. Анда пияз, сабиз, капуста, болгар калемпири сыяктуу жашылчалар, ошондой эле алма жана курма сыяктуу мөмө-жемиштер сакталат.
