Манас шаарында курулуш эрежелери сакталбаган 14 кабаттуу үйдүн курулушу токтотулду
Жалал-Абад облусунун Манас шаарында мыйзам бузууларга байланыштуу 14 кабаттуу турак жай комплексинин курулушу убактылуу токтотулганын Курулуш министрлигинин басма сөз кызматы билдирди.
Маалыматка ылайык, пландан тышкаркы текшерүүнүн жүрүшүндө курулуш иштери керектүү уруксат берүүчү документтерсиз жана долбоордук-сметалык документацияга мамлекеттик экспертизанын оң корутундусуз жүргүзүлүп жатканы аныкталган. Ошондой эле жер иштерин толук бүтүрбөй туруп, пайдубал плитасынын бетон куюу иштери жүргүзүлгөн.
Белгиленгендей, объект курулуп жаткан объекттердин бирдиктүү мамлекеттик реестрине киргизилген эмес. Мындан тышкары, эмгекти коргоо жана коопсуздук техникасынын эрежелерин бузуу жумушчулардын өмүрүнө жана ден соолугуна коркунуч жараткан.
2026-жылдын 10-февралында компанияга мыйзам бузууларды жоюу тууралуу эскертүү берилген. Бирок коюлган талаптар аткарылган эмес.
Натыйжада "Легион Констракшн" ЖЧКсына 200 миң сом өлчөмүндө айып пул салынып, аныкталган мыйзам бузуулар толук жоюлганга чейин курулуш иштери токтотулду.
