Баткенде үйү, унаасы камсыздандырылгандарга 1,3 млн сом төлөм берилди
Президенттин Баткен облусундагы өкүлү Мамыржан Рахимов кырсыкка кабылган тургундарга жана мекемелерге Мамлекеттик камсыздандыруу уюмунун сертификаттарын тапшырды.
Өкүлчүлүктөн билдиришкендей, Лейлек районунун Көк-Таш айылынын тургуну Буузия Камалидиновага 450 миң сом берилди. Анын 6 бөлмөлүү үйү үстүбүздөгү жылдын 21-февралында электр зымдарынын кыска чыңалуусунан толугу менен күйүп кеткен.
Ал эми Кадамжай районунда жол кырсыгына кабылган Тез жардам кызматынын Toyota Hilux унаасы үчүн Баткен облустук ооруканасына 870 миң 470 сом өлчөмүндө компенсация төлөндү.
Жыл башынан бери Мамлекеттик камсыздандыруу уюмунун Баткен филиалы тарабынан жалпы 9 жаранга 2 млн 193 миң 275 сом төлөндү.
Анын ичинде:
- Үйлөрү жабыркаган 6 жаранга 988 миң 406 сом;
- Жол кырсыгынан мүлкүнө зыян келген 2 жаранга 334 миң 399 сом;
- Тез жардам унаасы үчүн 870 миң 470 сом.
Мамлекеттик камсыздандыруу кырсык учурунда жарандардын жана мекемелердин чыгымдарын калыбына келтирүүдөгү эң натыйжалуу курал экенин далилдөөдө.
