“Будда бар” ресторанын жер тилкеси мамлекетке кайтарылды
Кыргызстан менен Түштүк Кореянын Достук паркынын аймагындагы “Будда бар” жайгашкан аянты 1 330 чарчы метр болгон жер тилкеси Бишкек шаарынын муниципалдык менчигине кайтарылды. Бул тууралуу Бишкек шаардык мэриясынан билдиришти.
Бишкек шаарынын мэри Айбек Жунушалиев аталган аймакты жеринен барып көрүп чыкты. Текшерүүнүн жүрүшүндө шаар башчысы Жер пайдаланууну көзөмөлдөө башкармалыгына аймактагы учурдагы тосмону бузуу тапшырмасын берди. Ал эми райондук администрациянын башчысына аймакты көрктөндүрүү жана жашылдандыруу иштерин жүргүзүү, ошондой эле кошумча бак-дарактарды отургузуу мүмкүнчүлүгүн карап чыгуу милдети коюлду.
Жыйынтыгында Бишкек шаарынын мэри Айбек Жунушалиев бул аймакты парктын курамында сактап, анын функционалдык багытын өзгөртүүгө жол бербөөнү жана жер тилкесин парк менен бирдиктүү стилде көрктөндүрүүнү тапшырды.
