Кумшекер менен өсүмдүк майынын баалары бир жылда кандай өзгөрдү – сереп
Монополияга каршы мамлекеттик агенттик кант жана өсүмдүк майына бааны мамлекеттик жөнгө салуу боюнча 2021-жылдын жыйынтыгын чыгарды.
Аталган мекеме базардагы бааны турукташтыруу үчүн мамлекет бир топ чараларды көргөнүн айтат.
- 1-июлдан 31-августка чейин кумшекер жана күн карама майын импорттоодо КНСтин ставкасын жокко чыгарган
- 23-июндан тартып жылдын аягына чейин кантты жана өсүмдүк майын экспорттоого убактылуу тыюу салган
- ата мекендик кант өндүрүүчүсү «Кайыңды-Кант» ААК үчүн КНС төлөөнү 80%га төмөндөткөн
- 25-майдан 25-августка чейин бааларга убактылуу мамлекеттик жөнгө салуу киргизген
Акыркы чечимди аткаруу максатында, Монополияга каршы мамлекеттик агенттик канттын жана өсүмдүк майынын дүң баасына чекене үстөктөрдүн максималдуу өлчөмүн (регионго жараша 10% жана 13%) белгилеген.
Мындан тышкары, ведомство ЕЭК Кеңешинин чечими менен Кыргызстанга 15-майдан 30-сентябрга чейинки аралыкта 40 миң тоннага чейин алымсыз кумшекерди импорттоо үчүн тарифтик жеңилдик берилгенин айтат.
Бул чаралардын баары кант жана күн карама майынын баасын турукташтыруу үчүн жасалган.
Канттын чекене баасы кандай өзгөрүп турду
Республика боюнча орточо баалар (сом/кг)
Жыл башынан бери канттын баасы акырындык менен январь айында 1 кг 54 сомдон мартта 63 сомго чейин өсө баштаган. Андан кийин Экономика министрлиги менен соода түйүндөрүнүн ортосунда келишим түзүлүп, анын аркасында бааны турукташтырууга мүмкүн болгон.
Андан ары мамлекеттик жөнгө салуунун жана башка чаралардын киргизилиши менен баалар 25-августка чейин туруктуу сакталып, ал тургай бир аз арзандаганы да байкалган. Бирок андан кийин канттын баасы кайра көтөрүлө баштаган.
Ноябрь айынын аягынан тартып, республиканын кант заводдору канттын дүң баасын 64.85 сомго чейин көтөрүштү. Натыйжада, чекене сатуудагы кумшекердин баасы да кымбаттап, соода түйүндөрү 68 сомго чейин кымбаттаткан.
Ата мекендик өндүрүүчүлөр менен ири түйүндөргө («Глобус», «Фрунзе», «Народный») жеткирилген кумшекердин дүң баасын кг үчүн 64.85 сомдон 63 сомго түшүрүү (жеткирүү менен кошо) боюнча макулдашуу болгон.
Мындан улам учурда аталган түйүндөрдө кумшекер 65 сомдон сатылууда.
Өсүмдүк майынын баасы кандай өзгөрдү?
республика боюнча орточо баасы (сом/л)
Жыл башынан бери күн карама майынын баасынын туруктуу өсүшү байкалууда – январь айында литри 131 сомдон июнда 161 сомго чейин көтөрүлгөн. Мамлекеттик жөнгө салуу киргизилгенден кийин анын баасы сентябрга чейин (150 сом), башкача айтканда, мамлекеттик жөнгө салуу аяктаганга чейин (25-август) төмөндөй баштаган.
Ал аяктагандан кийин өсүмдүк майынын баасы бүгүнкү күнгө чейин туруктуу бойдон калууда.
