Улуттук банк ички валюта рыногуна катышуусун улантат – 13 млн доллар өлчөмүндө интервенция жүргүздү
Улуттук банк ички валюта рыногунда жана тышкы финансылык рыноктордо түптөлгөн жагдайга туруктуу көз салып турат. Зарыл болгон шартта ички валюта рыногуна катышуусун улантат жана аны жумшартуу үчүн зарыл инструменттерге ээ. Мындай билдирүүнү регулятор жасады.
УБ Украинадагы кырдаалдан улам ички валюта рыногунда долларга суроо-талаптын жогорулашы байкалып жатканын белгилеп, мындай абал көбүнчө психологиялык факторлорго жана рыноктун катышуучуларынын күтүүлөрүнө байланыштуу келип чыкканын айтты.
- Эскерте кетсек, Укранинадагы окуялардан улам бүгүн Кыргызстанда рубль төмөндөп, доллардын курсу 95 сомго чейин жетти.
«Улуттук банктын эл аралык резервдеринин көлөмү жетиштүү жана ал өлкөнүн товарлар жана кызмат көрсөтүүлөр рыногунун келечектеги көлөмүнүн 6 айын жабат. 2022-жылдын 22-февралына карата абал боюнча Улуттук банктын эл аралык резерви 2 млрд 792.4 млн долларды түзөт.
Эл аралык резерв запасынын жетиштүү болушу жана валюталык интервенцияларды жүргүзүү аркылуу Улуттук банктын ыкчам кийлигишүү мүмкүнчүлүгүнүн болушу валюта рыногунда жагдайдын туруктуу абалда кармалып турушун камсыз кылат», – деп айтылат билдирүүдө.
- Улуттук банк бүгүн, 24-февралда доллардын курсун кармоо үчүн 13 млн доллар өлчөмүндө интервенция жүргүзүүдө. Бул тууралуу Улуттук банктын маалымат кызматы Economist.kg басылмасына билдирди.
Белгилей кетсек, КР 1993-жылдан тартып өзгөрүлмөлүү алмашуу курсунун режими менен иштеп келет. Анын алкагында чет өлкө валютасына карата суроо-талап менен сунуштун балансынын негизинде курстун динамикасы аныкталат.
