Төрт айда керектөө баалары 7.1%га кымбаттады – эң көп Нарында көтөрүлдү
Үстүбүздөгү жылдын январь-апрелинде (өткөн жылдын декабрь айына салыштырмалуу) жалпы республика боюнча керектөө баалары 7.1%га өстү. Эң көп жаңы чыккан жашылчалардын баасы жогорулаган (30%). Мындай маалыматты Улуттук статистикалык комитет берди.
Тамак-аш азыктарынын жана алкоголдуу ичимдиктердин, ошондой эле алкоголсуз суусундуктардын жана тамекинин баасы 9.8%га, азык-түлүк эмес товарлар 4.2%га, калкка кызмат көрсөтүүнүн тарифтери 2.4%га өскөнү байкалды.
Жаңы чыккан жашылчалардын баалары (+29.8%), кант (+22.9%), сүт азыктары (+16.5%), ун (+14.9%), сыр (+11.8%), ошондой эле макарон жана башка дан азыктарынын баалары жогорулаган.
Республика боюнча бардык жерде баалар кымбаттаган. Бирок башка региондорго салыштырганда эң чоң пайыздык көрсөткүч (8.2%) Нарын облусунда катталган. Улутстатком мунун себебин башка аймактарга караганда алкоголдуу ичимдиктерге жана тамекиге болгон баанын өсүшү (17.8%га) менен түшүндүрдү.
Жылдык инфляция (2021-жылдын апрелинен 2022-жылдын апрелине чейин) 14.5%ды түздү.
