Кыргызстандын экономикасы 2022-жылдын аягына карата кандай көрсөткүчтөрдү берүүдө? — Улутстаткомдун талдоосу
Улуттук статистикалык комитет өзүнүн бул жылга карата талдоосун жүргүзүп, алынган маалыматтардын негизинде Кыргызстандын экономикасына тиешелүү бир катар көрсөткүчтөрдү берди.
ИДП
Ички дүң продукт үстүбүздөгү жылдын январь-ноябрында алдын-ала баалоо боюнча 781 млрд сомдон ашты жана 2021-жылдын январь-ноябрына салыштырмалуу 7%га көбөйдү.
«Кумтөр» кен казуу ишканаларын эсепке албаганда, ИДПнын көлөмү үстүбүздөгү жылдын январь-ноябрында 726 млрд сомдон ашты жана 4.8%га көбөйдү.
Керектөө баалары
Үстүбүздөгү жылдын январь-ноябрында (мурунку жылдын декабрына салыштырмалуу) керектөө бааларынын жана тарифтеринин жалпы республика боюнча өсүшү 13.5%ды түздү.
Мында алкоголдук ичимдиктердин жана тамеки азыктарынын баалары – 21.7%га, тамак-аш азыктары жана алкоголсуз суусундуктар – 14.8%га, азык-түлүк эмес товарлар – 11.4%га, калкка көрсөтүлүүчү кызмат көрсөтүүлөрдүн тарифтери – 8.4%га жогорулады.
Өнөр жай
Улутстатком өнөр жай продукцияларынын көлөмү 2022-жылдын январь-ноябрында 383 млрд сомдон ашканын билдирди.
Негизги металлдарды (30%), жыгач жана кагаз буюмдарын өндүрүүнүн, полиграфиялык ишмердиктин (29.3%), мунайзат азыктарын (14.4%), тамак-аш азыктарын (суусундуктарды кошкондо) жана тамеки азыктарын өндүрүүнүн (11.2%), текстиль өндүрүшүнүн, кийим жана бут кийим, булгаары жана булгаарыдан жасалган буюмдарды өндүрүүнүн (5.9%), ошондой эле пайдалуу кендерди казуунун (8.5%) көлөмүнүн өсүшүнүн эсебинен өткөн жылдын январь-ноябрына салыштырмалуу 14%га көбөйдү.
Курулуш
Курулушта оң тенденциялар байкалды, мында көлөмдүн көбөйүшү 5.3%ды түздү, ал эми айыл чарбасында 6.4%ды, дүң жана чекене соодада 7.6%ды түздү.
Тышкы соода
КРнын товарларынын тышкы жана өз ара соодасынын көлөмү 2022-жылдын январь-октябрында 9.6 млрд долларды түздү жана 2021-жылдын январь-октябрына салыштырмалуу 41.2%га көбөйдү.
Экспорттук жөнөтүүлөр 23.1%га азайган, ал эми импорттук келип түшүүлөр тескерисинче, 1.7 эсеге өскөн.
КРнын ЕАЭБге мүчө мамлекеттер менен өз ара соодасынын көлөмү 2022-жылдын январь-октябрында 3.8 млрд долларды түздү жана 2021-жылдын январь-октябрына салыштырмалуу 39.2%га көбөйдү. Мында экспорттук жөнөтүүлөр 1.9 эсеге, импорттук келип түшүүлөр 22.9%га көбөйгөн.
2022-жылдын январь-октябрындагы республиканын ЕАЭБге мүчө мамлекеттер менен өз ара соодасынын эң жогорку үлүшү Россияга (72.3%) жана Казакстанга (25.5%) туура келди.
