Чүй, Ош облустарында жүгөрүдөн экинчи түшүм алынды
“Кыргызмамасылтукум” мамлекеттик ишканасы быйыл жүгөрүнүн экинчи түшүмүнөн жакшы түшүм алууга жетишкенин Суу ресурстары, айыл чарба жана кайра иштетүү өнөр жайы министрлигинен билдиришти.
Аталган ишкананын Сокулук райондук филиалы 20-июлда буудай түшүмүн жыйнаган соң биринчи жолу экинчи түшүм алуу үчүн жүгөрү уругун сепкен. Учурда талаадагы жүгөрү бышып, чабууга даяр болгону айтылат.
Ошондой эле мекеменин Ош облустук “Катта-Талдык” филиалы силос үчүн өстүрүлгөн жүгөрүнүн экинчи чабыгынан мол түшүм алып, 110 тонна сапаттуу силос өндүргөн. Министрликтен белгилешкендей, бул аракеттер мал чарбасынын тоют базасын чыңдоого, жерди рационалдуу пайдаланууга жана экинчи түшүм алуу тажрыйбасын кеңейтүүгө багытталган.
