Кыргызстанда критикалык минералдар стратегиясы даярдалып жатат
Кыргызстанда 22 критикалык минерал бар экенин Жаратылыш ресурстары, экология жана техникалык көзөмөл министринин орун басары Алишер Курманалиев “Кен казуу тармагы боюнча диалог: инвестиция, ачыктык, өнүгүү” форумунда билдирди.
Анын айтымында, Президенттин 2024-жылдын 22-январындагы экономиканы динамикалуу өнүктүрүү үчүн полиметаллдарды жана сейрек кездешүүчү элементтерди казып алуу боюнча улуттук долбоорду ишке ашыруу жөнүндө жарлыгынын алкагында критикалык минералдарды өнүктүрүү стратегиясы даярдалып жатат. “Азырынча өлкөдө жалпы 22 критикалык минерал аныкталды жана тизме дагы кеңейтилет", - дейт министрдин орун басары.
Аталган министрлик өкүлүнүн пикиринде, критикалык минералдардын тизмесин иштеп чыгуу өлкөдөгү ресурстук коопсуздук, инвестиция тартуу, кайра иштетүү өнөр жайын өнүктүрүү үчүн стратегиялык мааниге ээ.
