Кыргыз өндүрүшчүлөр көргөзмөсү Абу-Дабиде коюлду
21-23-октябрда Абу-Даби шаарында Abu Dhabi International Food Exhibition (ADIFE 2025) эл аралык көргөзмөсү өтүп жатканын Экономика жана коммерция министрлиги билдирди.
Кыргызстан буга Экономика жана коммерция министрлигине караштуу "Кыргыз экспорт" борборунун демилгеси жана Кыргызстандын БАЭдеги элчилигинин колдоосу менен катышкан.
Эл аралык көргөзмөгө Кыргызстандан 12 ата мекендик компания катышып, көргөзмөдө кондитердик азыктарды, ичүүчү жана минералдык суусундуктарды, кулпунайды, кургатылган өрүктү, жаңгакты, мистени, органикалык майларды, ошондой эле буурчак жана фасоль сыяктуу айыл чарба продукцияларын сунуштап жатышат.
Кыргызстандын улуттук павильону “Made in Kyrgyzstan” брендин эл аралык рынокто илгерилетүүгө жана ата мекендик өндүрүүчүлөрдүн экспорттук мүмкүнчүлүктөрүн кеңейтүү үчүн коюлган.
