Кыргызстанда креативдүү продукттар боюнча CreaPark 2025 сынагы башталды
Кыргызстанда креативдүү продукттар боюнча CreaPark 2025 сынагы башталганын “Кабар” агенттигинде өткөн маалымат жыйынында Креативдүү индустриялар паркынын директору Канышай Мамытова билдирди.
Анын айтымында, бул сынакка катышуу жарандарга эксперттерден мастер-класстарды алуу, нетворкинг жана тажрыйба алмашуу, долбоорду кеңири аудиторияга таанытуу, долбоорду ишке киргизүү же кеңейтүү үчүн каржылык колдоо алуу мүмкүнчүлүктөрүн берет.
“Финалга чыккан катышуучулар өз долбоорлорун питч-сессия форматында сунуштайт. Андан кийин эл аралык жана жергиликтүү спикерлер чыгып сүйлөшөт. Бул ар түрдүү тармактагы долбоорлор болушу мүмкүн. Мисалы, уюлдук компания өзүнүн уникалдуу IT-продуктун сунуштап, экологиялык жашыл экономика багытында идеясын көрсөтсө болот же уникалдуу экологиялык таңгак ойлоп тапкан колбаса фабрикасы да катыша алат. Негизгиси ар кандай долбоорлор, ар кандай креативдүү идеялар кабыл алынат. Биздин сынак бардык жарандарга ачык жана бирдей мумкүнчүлүктөрдү берет. Сынакка бардык курактагы жарандар, жарандыгына же башка белгисине карабастан катыша алышат”, - дейт Мамытова.
Ошондой эле анын айтымында, сынакка авторлор китептер, комикстер, арт жана сценалык долбоорлор; дизайнерлик, технологиялык жана инновациялык чечимдер; идея этабынан тартып, даяр бизнеске чейинки бардык креативдүү продукциялар менен да катыша алшат.
