Президент АКШга РегТек инновацияларынын аймактык хабын түзүүнү сунуштады
Кыргызстанда IT кызмат көрсөтүүлөрүн экспорттоо жакшы өнүгүп жатканын президент Садыр Жапаров Вашингтон шаарында өткөн "Борбордук Азия - АКШ" (C5+1) саммитинде билдирди.
Анын айтымында, акыркы 5 жылда Кыргызстандан АКШга IT кызматынын экспорту 45 эсеге көбөйгөн. Өлкө башчысы белгилегендей, 2024-жылы кыргыз IT адистери дүйнөнүн 63төн ашык мамлекетине кызматтарын 130 млн долларга экспорттогон.
“IT кызматтарынын 40%ы Америкага экспорттолду, анын ичинде Силикон өрөөнүндөгү компанияларга. Эл аралык Чейн анализис (Chainalysis) индексине ылайык, учурда Кыргызстан криптовалютаны кабыл алуу боюнча дүйнөдө 19-орунда турат. Бул жагынан алганда, Кыргызстан АКШ санариптик жөнгө салууну, анын ичинде РегТек (RegTech) инновацияларын өнүктүрүүдө өнөктөштүктү сунуштайт. Тактап айтканда, Америка тарапка Кыргызстанда РегТек инновацияларынын аймактык хабын (RegTech Trust Hub) түзүүнү сунуштамакчымын”, - деди мамлекет башчысы.
