Э.Байсалов: "Кыргызстан келечекте карбондук насыя сатууга барат"

КабМин төргасынын орун басары Эдил Байсалов Бразилиянын Белем шаарында климаттык СОР30 саммитине катышып, климаттын өзгөрүшүнө каршы Кыргызстан кандай чараларды көрүп жатканын айтты. Ошондой эле ал дүйнөлүк коомчулукту глобалдык жылуунун таасирин көбүрөөк тартып жаткан тоолуу өлкөлөрдү колдоого чакырды. 

Анын айтымында, Кыргызстан 2030-жылы парник газын 18%га, а дүйнөлүк коомчулуктун колдоосу менен 30%га азайтып,  XXI кылымдын ортосунда көмүртекти нейтралдуулукка жетүү пландалып жатканын билдирди. Муну ишке ашырыш үчүн өлкөгө 6 млрд доллардан кем эмес каражат керектигин да Э.Байсалов баса белгиледи. 

Буга байланыштуу Э.Байсалов эң аз каражат алып жаткан тоо системасын коргоо боюнча программаны каржылоо үчүн өзүнчө глобалдык фонд түзүүнү сунуштады. Ошондой эле ал Кыргызстанда көмүртектик сооданын улуттук системасы иштелип жатканын, токой катмарын кобөйтүү үчүн жакынкы жылдары 800 млн бак-дарак отургузууга максат коюлганын кошумчалады. 

МинКаб төрагасынын айтымында, бул келечекте карбондук насыяларды сатууга жана андан жылыга 500 млн доллар табууга шарт түзөт.