Жол белгилерин чийүүчү термопластик Сокулукта өндүрүлө баштады
Кыргызстанда жол белгилерин чийүүдө колдонулуучу термопластик өндүрүлө баштаганын Транспорт жана коммуникациялар министрлигине караштуу “Өндүрүштүк-инновациялык борбор” мамлекеттик мекемесинин директору Эмилбек Таштанбеков “Кабар” маалымат агенттигине билдирди.
Анын айтымында, өлкөнүн тоолуу климатында шарттар ар кандай болгондуктан, Кыргызстандын ар бир аймагы үчүн өзүнчө рецептура иштелип чыгат.
Эмилбек Таштанбеков белгилегендей, термопластиктин биринчи 20 тоннасы Баткен облусундагы ДЭУ-46га жеткирилген. Жазга чейин 1000 тоннага чейинки материалды даярдоо пландалган жана кийинчерээк аймактарга толук бөлүштүрүү иштери башталат. Учурда өндүрүштө 13 жумушчу иштеп жатат.
Термопластик курамынын 51%ы Кочкор жана Лейлек карьерлеринен казылып алынган ак доломит уну. Ошондой эле өзүнүн тегирменинде 5 микронго чейин майдалана турган ак мраморду колдонуу сыноодон өткөрүлүп жатыптыр. Химиялык компоненттер болсо Кытайдан импорттолот.
Бул долбоор "Вокко" ЖЧКсы менен түзүлгөн мамлекеттик-жеке өнөктөштүк келишими аркылуу ишке ашырылган. Бул кызматташтыктын алкагында Сокулук районунда жайгашкан 1000 чарчы метрди түзгөн бышкан кыштан курулган имарат өндүрүш базасы катары берилди.
Мурда термопластиктер толугу менен импортко көз каранды болуп келсе, эми алар ички рынокто өндүрүлөт. Долбоорду мамлекет 5 млн сомго, ал эми жеке өнөктөш 17 млн сомго каржылаган.
