Бишкекте 26-ноябрда 25,3° сельсияга жетип, рекорддук жылуу чегине жетти
Быйыл Кыргызстанда ноябрь айы жылуу өттү. Айдын экинчи жарымында бардык аймактарда аба ырайы көп жылдык орточо көрсөткүчтөрдөн 4-7° сельсияга жогору болгонун Кыргызгидромет кызматы маалымдады.
Бишкек шаарында 25-26-ноябрь күндөрү аба ырайы аномалдуу жогору болуп, 25-ноябрдагы максималдуу температура 20,2°С түзгөн. Буга чейин ноябрь айындагы мындай жогорку температура 1936-жылы катталып, ал 19,4° сельсияга жеткен. Ошондой эле быйыл 26-ноябрда аба ырайы 25,3° сельсияга чейин жылып, 1936-жылдын ушул күнүндөгү 23,4° сельсия абсолюттук максимумдан ашып кеткен.
Ушундай эле ноябрь айындагы абсолюттук максимум 2017-жылы 2-ноябрь күнү 29,8°сельсияны түзүп, рекорд койгон.
Кыргызгидромет кызматынын Болжолдоолор бөлүмүнүн башчысы Айзада Абдывалиева “Кабар” агенттигине буга чейинки ноябрь айы жылуу болгон жылдарды айтып берген.
“2023-жылы 16-ноябрда 24,5° сельсия, 2013-жылы 24,7° сельсия градус жылуу болгон. Ошондой эле 1999-жылы да 22,4 градусту түзгөн жылуу аба ырайы катталган”,-деген ал.
