В Кыргызстанда жаңы туристтик Nomad.kg порталы ачылды
Кыргызстанда көп тилдүү туристтик портал Nomad.kg тааныштырылды. Долбоордун автору, "Дестинация Талас" өкүлү Гамал Соронкуловдун айтымында, бул идея 2019-жылы эле пайда болгон.
"Бул убакыт ичинде биздин команда эки окшош долбоорду ишке ашырды — ecomap.kg (Кыргызстандын экологиялык бузулуулар картасы) жана map.kg, анда өлкөнүн кооздуктары жана биологиялык ар түрдүүлүктүн 32 негизги аймагы чагылдырылган. Бизге бул иште көптөгөн демилгелүү адамдар жардам берип келет", — дейт Гамал Соронкулов.
Анын айтымында, совет доорунан бери негизги көңүл көбүнчө Ысык-Көл облусуна бурулуп, Баткен жана Талас сыяктуу көптөгөн аймактар көңүл сыртында калып келген.
"Бирок бүгүн абал өзгөрдү. Биз өз долбоорубузду Талас облусунан баштадык, анткени бул аймакта туризмди өнүктүрүүгө чоң мүмкүнчүлүк бар. Көпчүлүк кыргызстандыктар Таласта негизги үч жерди билишет — Манас-Ордо, жазуучу Чыңгыз Айтматовдун мекени болгон Шекер айылы жана Беш-Таш улуттук табигый паркы. Биз азыр Талас боюнча болжол менен 30 локацияны көрсөтүүгө даярбыз», — деп белгиледи ал.
Долбоордун дагы бир автору, "Фотожурналисттер союзу" коомдук уюмунун өкүлү Владислав Ушаков болсо сайтты толтуруу иштери жаңы эле башталганын кошумчалады.
"Тилекке каршы, чоң маалыматтык боштук бар, өзгөчө кыргыз тилинде. Эгер Кыргызстандагы локациялар тууралуу маалыматты мамлекеттик тилде издесеңиз, 30дан ашык жер таба албайсыз. Биздин ресурста маалымат кыргыз, орус жана англис тилдеринде болот. Nomad.kg коммерциялык эмес, ар бир аймактан акча табуу максатыбыз жок. Биздин максат — адамдар Кыргызстан жөнүндө өздөрүнө түшүнүктүү тилде көбүрөөк маалымат алышып, жаңы жерлерди көрүп барышы. Туризм Кыргызстандын аймактарынын өнүгүүсүнө жана экономикасына салым кошот", — деди ал.
