Кыргызстанда акыркы 10 жылдан бери биринчи суу кундузу катталды
Кыргызстанда он жылдан бери биринчи жолу ортоазиялык суу кундузу катталганын Жаратылыш ресурстары, экология жана техникалык көзөмөл министрлигинен билдиришти.
"Хан-Теңири" мамлекеттик жаратылыш паркынын кызматкерлери Казакстан менен чектеш Турук дарыясында суу кундузун видеого тартып алышкан.
Белгиленгендей, бул Кыргызстандын аймагында кундуздун акыркы он жылдагы биринчи ишенимдүү катталышы болуп эсептелет.
2023-2025-жылдары Кызыл-Суу, Чаткал, Түп, Көкөмерен жана Чүй дарыяларында жүргүзүлгөн изилдөөлөрдө суу кундузуна тиешелүү эч бир издер табылган эмес. Бул көрүнүш кундуздун өлкөдө толук жоголуп кетүү коркунучун күчөткөн. Бирок, жаңы видеокадрлар суу кундуздарын Казакстандын аймагынан убактылуу кирип келиши мүмкүн экенин тастыктады.
"Турук дарыясындагы суу кундузу жалгыз келгенби же бул аймакта башка кундуздардын жашар-жашабасы иликтенет",-деп айтылат маалыматта.
