Президент Алайкуудагы кар жиреп мектепке барган балага өзүнүн уюлдук телефонун, ноутбук белек кылды
Президент Садыр Жапаров кечээ Ош облусунун Кара-Кулжа районунун Коо-Чаты айылындагы “Айдың-Көл” башталгыч мектебинин 4-классынын окуучусу Нурзаман Алмазбековду кабыл алганын "Кабар" агенттиги жазды.
Буга чейин социалдык тармактарда 4-класстын окуучусунун калың карды жиреп мектепке баратканы тууралуу видео тараган. Өлкө башчысы видеону көрүп, кичинекей окуучунун билимге болгон умтулуусун жогору баалаган.
Ал Нурзаманды президенттик балатыга чакырган. Кечээ жеке өзү аны кабыл алып, ноутбук жана топ белек кылды. Мындан тышкары, Садыр Жапаров окуучуга өзүнүн уюлдук телефонун да берди.
Мамлекет башчысы бул бала ага өзүнүн бала чагын, алыскы Кең-Суу айылында кар кечип мектепке барган кездерин эске салганын айтты.
Жолугушуунун соңунда президент Нурзаманга чоң ийгиликтерди каалап, алдыда "Акылман" президенттик лицейинде окууга да мүмкүнчүлүгү бар экенин кошумчалады.
