Эс алам десең "Евразия" маданий-эс алуу паркына кел
Кечээ "Евразия" маданий-эс алуу паркында кышкы сезонду салтанаттуу ачуу аземи болуп өттү. Парктагы майрамдык жасалгалардын негизги элементи –жаңы жылдык балаты болду.
"Евразия" маданий-эс алуу паркынын директору Вячеслав Шариков парк шаар тургундары үчүн маанилүү коомдук мейкиндикке айланганын белгиледи. Ачылгандан бери паркты болжол менен жарым миллионго жакын адам зыярат кылган.
"Биз жылдын каалаган мезгилинде шаар тургундары жана борбордун коноктору тартыла турган мейкиндикти түздүк. “Евразия” паркы — шаардык жашоонун маанилүү бөлүгү, үй-бүлөлүк эс алуу, баарлашуу жана маданий салттар менен таанышуу үчүн ылайыктуу жай", — деп белгиледи Вячеслав Шариков.
Кышкы сезон алкагында паркта ачык асман алдындагы муз аянтчасы иштеп жатат. Парк аймагында 30дан ашуун тематикалык фотозоналар жана арт-инсталляциялар жайгаштырылган, алардын арасында бийиктиги 10 метрди түзгөн Аяз атанын фигурасы да бар.
Балдар үчүн паркта эки Аяз атанын үйү иштеп жатат, анда күн сайын кичинекей коноктор менен жолугушуулар өткөрүлөт. Ошондой эле майрамдык даамдар жана сувенирлер сунушталган "Түндүк жаркыроосу" аттуу кышкы жарманке өз ишин баштады.
"Евразия" паркындагы кышкы программа цирктеги жаңыланган көрсөтүүлөрдү, сахнадагы шоу-программаларды, театралдаштырылган оюн-зоокторду жана жомок каармандарынын катышуусундагы көңүл ачуучу иш-чараларды камтыйт.
Жаш коноктор үчүн чыгармачылык үйлөр иштеп жатат, анда балдар сүрөт тартуу, чопо менен иштөө жана аквагрим боюнча мастер-класстарга катыша алышат. Активдүү эс алууну жактыргандар үчүн адистердин жетекчилиги алдында коньки тебүүнү үйрөткөн "Муз мектеби" долбоору сунушталат. Мындан тышкары, "Улуттук салттар" программасынын алкагында боз үйдө салттуу маданияттын элементтери менен тааныштырып, таанып-билүүчү жана интерактивдүү иш-чаралар өткөрүлөт.
