Кыргызстанга Camperghini долбоорунун негиздөөчүсү Коннор Кампергини келди
Кыргызстанга эл аралык тревел-блогер жана Camperghini долбоорунун негиздөөчүсү Коннор Кампергини келгенин Туризм департаментинин басма сөз кызматы маалымдады.
Сапардын жүрүшүндө блогер өлкөнүн бардык жети аймагын кыдырып чыгууну пландоодо. Программага негизги туристтик багыттар жана табигый объекттер менен таанышуу, ошондой эле туристтик бизнес жана жергиликтүү коомчулуктар менен жолугушуулар кирет.
Сапардын жыйынтыгында долбоордун эл аралык платформаларында Кыргызстандын туристтик потенциалы тууралуу материалдар жарыяланары күтүлүүдө. Уюштуруучулар билдиргендей, бул сапар өлкөнү автотуризм жана туруктуу саякаттар үчүн перспективдүү багыт катары илгерилетүүгө багытталган.
Camperghini — автордук эл аралык долбоор болуп, авто саякат (road-trip) форматында иштейт. Анын алкагында Коннор ар кайсы өлкөлөргө өз унаасы менен сапарлап, туристтик маршруттар, инфраструктура, жайгашуу каражаттары, гастрономия жана жергиликтүү маданият тууралуу айтып берет. Долбоордун аудиториясы өз алдынча туризмге жана авто маршруттарга кызыккан саякатчылардан турат.
