Жогорку Кеңеште санариптешкен заманбап музей жана жыйындар залдары ачылды
Бүгүн, Президент Садыр Жапаров менен Жогорку Кеңештин Төрагасы Марлен Маматалиевдин катышуусунда парламенттеги санариптешкен заманбап музей менен жаңыланган жыйындар залдары ишке киргизилди.
Жогорку Кеңештин басма сөз кызматынан билдиргендей, аталган залдар толугу менен санариптик форматта иш алып барууга ыңгайлаштырылган. Айрыкча жергиликтүү өз алдынча башкаруу органдарынын өкүлдөрүнүн онлайн катышуусуна керектүү шарттар түзүлгөн. Бул өз кезегинде маселелердин ачык-айкын жана толук-кандуу талкууланышына көмөкчү болуп, убакытты натыйжалуу пайдаланууга да өбөлгө болот.
Ишчаранын жүрушүндө өлкө башчыны парламенттин жаңыланган музейинен атайын гид-робот босогодон тосуп алып, музей тууралуу кеңири маалымат берди.
Гид-робот белгилегендей, музей эки бөлүктөн туруп, анын бири кыргыз элинин жана кыргыз парламентинин тарыхына арналган. Ал эми экинчи бөлүгү “Санарип парламент” деп аталып, Жогорку Кеңештин жалпы ишмердүүлүгү, анын ичинен мыйзам чыгаруу иши санариптик форматта чагылдырылган.
Президент жаңыланган музейдин ишине жогору баасын берип, парламенттин тарыхы жана иши менен шайлоочулар, айрыкча жаштар жана жалпы эле меймандар кабардар болуп турушу керектигин кошумчалады.
