Бүгүндөн тарта оор жүк ташуучу унааларга убактылуу чектөө киргизилет
Транспорт жана коммуникациялар министрлиги 2026-жылдын 1-июнунан 1-сентябрына чейин жалпы салмагы 18 тоннадан ашкан жүк ташуучу унаалардын кыймылына убактылуу чектөө киргизерин маалымдады.
Чектөө жайкы мезгилде абанын температурасы жогору болгон учурда автомобиль жолдорунун бузулушун алдын алуу, алардын техникалык абалын сактоо жана пайдалануу мөөнөтүн узартуу максатында кабыл алынган.
Министрликтин маалыматына ылайык, күндүз абанын температурасы +28°C жогору болгондо саат 10:00дөн 20:00гө чейин жалпы пайдалануудагы автомобиль жолдорунда оор жүк ташуучу унаалардын жүрүүсүнө чектөө коюлат.
Ошол эле учурда бул талап жүргүнчүлөрдү ташуучу транспортко, гуманитардык жардам жеткирген унааларга, тез бузулуучу азыктарды жана кооптуу жүктөрдү ташуучу транспорт каражаттарына жайылтылбайт. Мындан сырткары атайын уруксат менен ири көлөмдөгү жүктөрдү ташыган унааларга жана жол куруу, реконструкциялоо иштерине тартылган мекемелердин техникаларына да чектөө колдонулбайт.
Убактылуу чектөөнүн аткарылышын көзөмөлдөө Жерде жүрүүчү жана суу транспорту департаментинин көчмө топтору тарабынан транспорттук көзөмөл пункттарында жана жол кыймылынын коопсуздугуна тоскоолдук жаратпаган аймактарда жүргүзүлөт.
