Кыргызстанда Беларусь тракторлорун жыйноо жана өндүрүүчү завод куруу пландалууда

11-ноябрь 2026, 16:26 1 мүн. окуу

Кыргызстанда Беларусь тракторлорун жыйноо жана өндүрүүчү завод куруу пландалууда. Бул маселе 9-ноябрда Айыл чарба минстри Эрлист Акунбековдун Беларусь Республикасына болгон жумушчу сапарынын алкагында Минск трактор заводунда (МТЗ) каралды.

Эрлист Акунбеков Кыргызстанда машина-трактор паркын жаңылоо жана дыйкандарды жеткиликтүү техника менен камсыздоо артыкчылыктуу багыт экенин белгилеп, жергиликтүү өндүрүш техниканын өздүк наркын жана жеткирүү чыгымдарын төмөндөтүүгө шарт түзөрүн айтты.

Айыл чарба министрлигинин билдирүүсүнө караганда, акыркы беш жылда лизинг аркылуу дыйкандарга 36,8 млрд сомдук 13 миңден ашык айыл чарба техникасы берилген.

Мындан тышкары, "Белнефтехим" концерни менен продукция жеткирүү, "Ждановичи" агрокомбинаты менен жашылча жана сүт продукциясын өндүрүү, кайра иштетүү багытында кызматташуу маселелери каралды.

Ошондой эле 10-ноябрда өткөн Кыргызстандын жана Беларустун аймактар аралык биринчи форумунун жыйынтыгында алты документке кол коюлду.

Алар соода-экономикалык, илимий-техникалык жана маданий кызматташтыкты, 2027–2029-жылдарга карата жол карталарын жана аймактар ортосунда боордоштук байланыштарды өнүктүрүүнү камтыйт.

Кыргызстандын экономика, бизнес, финансы тармактары боюнча маалыматтарды, ийгиликтүү ишкерлер менен болгон кызыктуу маектерди Ишкер MEDIA сайтынын Telegram, Facebook, Instagram, Threads жана Х каналдарынан окуп, көрүп туруңуздар.

Күндүн негизги жаңылыктары — Telegram каналыбызда Каналга катталуу

Транспорт