Түндүк айланма жолундагы иштерге текшерүү жүргүзүлдү
Курулуш, архитектура жана турак жай-коммуналдык чарба министрлигинин буйругуна ылайык, Мамлекеттик архитектура-курулуш контролдоо департаментинин Бишкек шаардык башкармалыгы тарабынан Алматы – Бишкек – Ташкент унаа жолунун 230,7 – 255,0-чакырымын жана Бишкек – Балыкчы –Нарын– Торугарт унаа жолунун 0 – 9,1-чакырымын (Бишкек шаарынын Түндүк айланма жолу) бөлүгүн реконструкциялоо долбоорунда мониторинг жүргүзүлдү. Бул тууралуу аталган министрликтин басма сөз кызматы билдирди.
Маалыматка ылайык, мониторингдин негизги максаты – курулуш, архитектура жана шаар куруу жаатындагы ченемдик-укуктук актылардын, техникалык регламенттердин жана курулуш ченемдеринин талаптарынын сакталышын камсыз кылуу, ошондой эле курулуш-монтаждоо иштеринин сапатына көзөмөлдү күчөтүү болуп саналат. Жалпы узундугу 33,4 чакырымды түзгөн объектте реконструкциялоо иштери “Чайна Роуд” ЖЧКсы тарабынан аткарылып жатат.
Текшерүү учурунда төмөнкү маселелерге өзгөчө көңүл бурулду:
курулуш-монтаждоо иштеринин долбоордук чечимдерге ылайык аткарылышы;
аткарылып жаткан иштердин сапатынын курулуш ченем жана мамлекеттик стандарттарга шайкештиги;
курулуш материалдарынын, конструкциялардын жана буюмдардын сапатын тастыктаган сертификаттардын жана лабораториялык сыноолордун жыйынтыктарынын болушу; аткаруу журналдарынын жана аткаруучулук-техникалык документтердин талаптагыдай жүргүзүлүшү;
эмгекти коргоо талаптарынын сакталышы;
курулуш аянтында жол кыймылынын коопсуздугун камсыз кылуу жана убактылуу жол белгилеринин орнотулушу.
Мониторингдин жыйынтыгында подряддык уюм “Чайна Роуд” ЖЧКсына курулуш иштеринин сапатын туруктуу көзөмөлдөп туруу, ошондой эле курулуш материалдарынын сапаты боюнча лабораториялык текшерүүлөрдү өз убагында жүргүзүү боюнча тиешелүү түшүндүрүү иштери жүргүзүлүп, сунуштар берилди.
