Таласта жашылча-жемиштерди кайра иштетүүчү завод курулууда
Айтматов районуна караштуу Аманбаев айылында жашылча-жемиштерди сактоочу жана кайра иштетүүчү "Талас Органик" ЖЧКсынын заводунун курулушуна капсула салынды. Бул тууралуу президенттин Талас облусундагы ыйгарым укуктуу өкүлү билдирди.
Маалыматка ылайык, долбоордун алкагында 300 гектар айдоо жер өздөштүрүлүп, анын 40 гектарына картошка эгилген. Ошондой эле тамчылатып сугаруу системасы орнотулуп, 100 метрлик скважина казылган жана көлөмү 10 миң куб метр болгон суу сактоочу жай пайдаланууга берилген.
Мындан тышкары, 20 гектар аянтка заманбап муздаткыч кампалар жана жашылча-жемиштерди кайра иштетүүчү өндүрүш комплекси курулуп жатат. Долбоордун жалпы наркы 320 миллион сомду түзөт.
Долбоор Альянс Алтын өнүктүрүү фонду тарабынан колдоого алынып, бүгүнкү күнгө чейин 200 миллион сом бөлүнгөн. Каражат айыл чарба техникаларын жана заманбап жабдууларды сатып алууга, бассейндерди курууга жана тамчылатып сугаруу системасын орнотууга багытталган.
Маалыматка караганда, жаңы ишкана жүздөгөн жумуш орундарын түзүп, Талас облусунун айыл чарба тармагын өнүктүрүүгө, фермерлердин мүмкүнчүлүктөрүн кеңейтүүгө жана экспорттук дараметин жогорулатууга өбөлгө түзөт.
Заводду ушул жылдын 31-августунда — Эгемендүүлүк күнүнө карата пайдаланууга берүү мерчемделүүдө.
