Транспорттук көзөмөл: 7 айда казынага 247 млн сомдон ашык каражат түштү
Быйыл жети айда транспорттук көзөмөлдөн мамлекеттик казынага жалпы 247 млн 197 миң 785 сом түшкөн. Бул тууралуу Транспорт министрлигинин басма сөз кызматы билдирди.
Маалыматка ылайык, аталган көрсөткүч өткөн жылдын ушул мезгилине салыштырмалуу 107,39%га көп.
Белгиленгендей, жыл башынан бери 500 миңге жакын транспорт каражаты текшерилип, анын жыйынтыгында 8 226 укук бузуу фактысы аныкталган. Бул өткөн жылдын тиешелүү мезгилине салыштырмалуу 156,63%га көп.
Укук бузуулар үчүн салынган айып пулдардан казынага 83 млн 330 миң сом түшүп, өткөн жылдын 7 айына салыштырмалуу 217%га өскөн.
Ошондой эле транспорт каражаттарынын салмак-габариттик өлчөмдөрүн ченөөдөн 7 млн 444 миң сомго жакын жыйым алынган.
Жолдорго келтирилген зыяндын ордун толтуруу үчүн төлөнүүчү жыйымдар 10 млн 615 миң сомду түзүп, өткөн жылга салыштырмалуу 152%га өскөн.
Ал эми атайын уруксат кагаздарын берүүдөн 135 млн 850 миң сомго жакын жыйым түшкөн. Бул көрсөткүч өткөн жылдын 7 айына салыштырмалуу 77%га аз.
Мындан тышкары, көп жолу колдонулуучу уруксат кагаздарынан 10 млн сомдон ашык жыйым түштү.
