Кел-Сууда кайыктардын коопсуздугу жана документтери текшерилди
Нарын облусунун Ак-Сай өрөөнүндөгү Кел-Суу көлүндө жергиликтүү кайыкчылар текшерилди. Бул тууралуу Транспорт жана коммуникациялар министрлигинин маалымат кызматы билдирди.
Текшерүү учурунда кайыктардын техникалык абалы, каттоо номерлери, суу транспортун башкарууга уруксат берүүчү документтер жана кайык башкаруучулардын тиешелүү күбөлүктөрү текшерилди.
Жыйынтыгында документтери толук эмес кайык ээлерине эскертүү берилип, мыйзам талаптарын бузган жана тиешелүү документтери жок учурлар боюнча протоколдор түзүлдү.
Министрликтин өкүлдөрү кайыкчыларга жүргүнчүлөрдүн коопсуздугун камсыз кылуу, кайыктардын техникалык абалын көзөмөлдөө жана белгиленген талаптарды так сактоо зарылдыгын эскертишти.
Ошондой эле кайыктын уруксат берилген сыйымдуулугунан ашык жүргүнчү ташыбоо, аба ырайын эске алуу жана коопсуздук каражаттары менен камсыз кылуу талаптары түшүндүрүлдү.
Кел-Сууга келген туристтердин саны көбөйүп жатканына байланыштуу суу транспортунун коопсуздугу боюнча көзөмөл иштери мындан ары да улантылат.
