Кемин – Шабдан – Көк-Ойрок жолуна асфальт төшөлүүдө
Чүй облусундагы Кемин – Шабдан – Көк-Ойрок автомобиль жолунда эки тараптуу асфальт төшөө иштери жүрүп жатат.
Транспорт жана коммуникациялар министрлигинин маалымат кызматынын айтымында, 2026-жылга карата титулдук тизмеге ылайык, аталган жолдун 5 чакырым тилкесин асфальттоо каралган.
Учурда №32 Жол эксплуатациялоо мекемеси тарабынан жол куруу иштери кызуу темпте жүргүзүлүүдө. Ишке 30га жакын атайын техника жана жумушчулар тартылып, жумуштар бекитилген графикке ылайык аткарылууда.
Ал эми бул жолдун оңдолуп, асфальтталышы аймактагы калктын каттамын жеңилдетип, жол жүрүү коопсуздугун жогорулатууга, унаалардын жүрүү убактысын кыскартууга жана жергиликтүү тургундардын социалдык объектилерге жетүүсүн жакшыртууга шарт түзөт. Ошондой эле айыл чарба продукцияларын жана башка жүктөрдү ташуунун ыңгайлуулугу артат.
Жол куруу иштеринин сапаты жана аткарылышы Транспорт жана коммуникациялар министрлигинин көзөмөлүндө.
