Бишкек мэри жол куруу иштеринин темпин күчөтүүнү тапшырды
Бишкек шаарынын мэри Айбек Жунушалиев Шабдан Баатыр көчөсү (мурдагы Лев Толстой көчөсү) менен Иманалы Айдарбеков көчөсүнүн (мурдагы Жаш Гвардия бульвары) кесилишинде курулуп жаткан жол түйүнүндөгү иштердин жүрүшүн текшерди.
Учурда объектте жол өтмөктөрүнүн ригелдери орнотулуп, көпүрө курулмаларын куруу иштери уланууда.
Мындан тышкары, шаар башчысы Фрунзе көчөсүндөгү жылуулук тармактарын реконструкциялоо иштеринин жүрүшү менен таанышты.
Бул тилкеде жылуулук тармактарындагы негизги иштер аяктап, жолду калыбына келтирүү иштери жүргүзүлүүдө. Учурда тилкенин 98%ында кайра көмүү иштери бүткөрүлдү. Топурак тыгыздалып, жолдун негизи асфальт төшөөгө даярдалууда. Ошондой эле жылуулук камераларынын капталдарын бекемдөө иштери аткарылууда.
Айбек Жунушалиев аныкталган кемчиликтерди жоюп, чектеш аймактарды талаптагыдай абалга келтирүүнү жана жашыл бак-дарактарды сугарууну күчөтүүнү тапшырды.
Текшерүүнүн жыйынтыгында мэр эки объектте тең курулуш иштеринин темпин күчөтүп, аткарылып жаткан иштердин сапатын камсыз кылуу боюнча тиешелүү кызматтарга тапшырма берди.
