Кыргызстанда жолдорду кышка даярдоо иштери күчөтүлөт
Транспорт жана коммуникациялар министрлигинде аппараттык жыйын өтүп, анда өлкөдөгү автомобиль жолдорунун абалы, күз-кыш мезгилине даярдык жана жол оңдоо иштеринин жүрүшү талкууланды.
Ведомствонун маалыматына ылайык, министр Талантбек Солтобаев кыш мезгилинде жол кыймылынын коопсуздугун жана үзгүлтүксүз транспорттук байланышты камсыз кылуу үчүн даярдык иштерин күчөтүү зарылдыгын белгиледи.
Тиешелүү жетекчилерге кышка керектүү туз жана башка тайгакка каршы материалдарды алдын ала камдоо, атайын жол техникаларын даяр абалга келтирүү жана алардын үзгүлтүксүз иштешин камсыз кылуу тапшырылды.
Ошондой эле битум сактоочу жайларды жана тиешелүү инфраструктуралык объектилерди белгиленген мөөнөттө бүткөрүп, кышка даярдык иштерин өз убагында аяктоо милдеттендирилди.
Жыйында өлкө аймагында жүрүп жаткан жол оңдоо жана асфальт төшөө иштери да каралды. "Нарын – Баетов" жана "Ала-Тоо Резорт" багытындагы, ошондой эле Гүлчө жана Нарын шаарларындагы жолдордо жүргүзүлүп жаткан иштерди сапаттуу жана өз мөөнөтүндө бүткөрүү тапшырылды.
Мындан тышкары, VI Дүйнөлүк көчмөндөр оюндарына жана Шанхай кызматташтык уюмунун иш-чараларына байланыштуу жолдордун абалын, транспорттук каттамдардын үзгүлтүксүз иштешин жана тиешелүү инфраструктуранын даярдыгын камсыз кылуу боюнча иштерди күчөтүү милдети коюлду.
Ошондой эле жол тармагында эмгектенген кызматкерлердин иш шарттарын жакшыртуу жана аларды бирдиктүү форма менен камсыз кылуу тапшырылды.
