Министрлер кабинети Айыл чарба министрлигин жетишсиз иш алып барганы үчүн сынга алды
Министрлер Кабинети өлкөнүн азык-түлүк коопсуздугун камсыз кылуу боюнча Айыл чарба министрлигинин ишин сынга алып, аны жетишсиз деп тапты. Бул тууралуу өкмөттүн басма сөз кызматы билдирди.
Бир катар бөлүм башчыларына эскертүүлөр жана сөгүш жарыяланды. Айыл, суу чарба жана аймактарды өнүктүрүү министри Аскарбек Жаныбековго жана анын суу чарба иштери боюнча орун басары Нурлан Шериповго сөгүш жарыяланды.
Ошондой эле, Айыл, суу чарба жана аймактарды өнүктүрүү министринин орун басары Азамат Мукашев ээлеген кызмат ордуна канчалык татыктуу экендиги жөнүндөгү маселени карап чыгуу тапшырылды.
«Эгер сиз убагында жетиштүү көңүл бурсаңыз, суунун жетишсиздиги, азык-түлүк коопсуздугу маселелери жаралмак эмес. Актанганды токтотуңуз. Министрлик башында эле өзүнө жүктөлгөн милдеттерди чечүү жөнүндө ойлонушу керек болчу. Акыркы 5 айдын иш планын алалы. Суу пайдалануучулар ассоциацияларынын ишин талдоо тапшырылган эле. Бүгүнкү күндө эч кандай сунуш жок. Региондордо кластердик механизмди ишке ашыруу боюнча дээрлик маалымат жок», – деди министрлер кабинетинин башчысы Улукбек Марипов.
