Кыргызстан суу жана канализация кызматтарын жакшыртуу үчүн инвестициялык пакет алды

Кыргызстандын шаарлары суу жана канализация кызматтарын жакшыртуу үчүн атайын жабдууларды алышты. Сатып алуулар ЕРӨБ жана ЕИБ насыялары, ошондой эле Европа Биримдиги менен ГЭФтин гранттары аркылуу жүргүзүлүүдө. Бул тууралуу финансы институтунун маалымат кызматы билдирди.

КРнын региондорундагы алты муниципалдык суу ишканасы жаңы атайын техника менен камсыз болуп, суу жана канализация системаларын тейлөө кызматтарын жакшыртууга мүмкүндүк алышты. Бул жаңы жабдуулар Европалык реконструкция жана өнүктүрүү банкы (ЕРӨБ), Европа Биримдиги (ЕБ), Европалык Инвестициялык Банк (ЕИБ) жана Глобалдык Экологиялык Фонд (ГЭФ) тарабынан берилген инвестициялык пакеттин эсебинен каржыланган.

Алты шаарга бөлүнгөн инвестициялык пакеттин ичинде ЕРӨБдүн 4.02 млн доллар жана 6 млн евро узак мөөнөттүү насыялары, ЕИБдин 1.45 млн евро насыясы, ЕРӨБдүн 1 млн евро менен ГЭФтин 1.15 млн еврого барабар гранттары, ошондой эле Европа Биримдиги тарабынан инвестициялык жана техникалык колдоо үчүн грант түрүндө берилген 20.55 млн евро каралган.

• Техникалык тейлөө үчүн 2.4 млн. евродон ашуун каражатка келген атайын унаалар жана жабдуулар алты шаарга жеткирилди

• Сатып алуулар ЕРӨБ жана ЕИБ насыялары, ошондой эле Европа Биримдиги менен ГЭФтин гранттары аркылуу колдоого алынды

• 165. 000 жергиликтүү тургун таза ичүүчү суу жана канализация кызматтары менен камсыз болушат

Долбоорлор ЕРӨБдүн жана донорлордун каржылык колдоосу менен КРнын Өкмөтү, муниципалитеттер жана суу менен камсыздоочу компаниялар менен биргеликте ишке ашырылууда.

Эскерте кетсек, 2014-2020-жылдар аралыгында Европа Биримдиги түрдүү секторлорду, анын ичинде билим берүү системасы, айыл жергесин комплекстүү өнүктүрүү жана мыйзам үстөмдүгү сыяктуу секторлорду колдоого КРга 174 млн еврого барабар көмөк көрсөткөн.  

Бүгүнкү күндө ЕРӨБ 191 долбоор аркылуу КРнын экономикасына 795 млн евролук инвестиция жасады.