Министрлер Кабинети COVID-19 боюнча чектөөлөрдү киргизбейт
Министрлер Кабинети бардык массалык иш-чараларды өткөрүүнү кошпогондо, кандайдыр бир чектөөлөрдү киргизүүнү көздөбөйт. Бул тууралуу кечээ Министрлер Кабинетинин төрагасы Улукбек Марипов Министрлер Кабинетинин кезексиз жыйынында билдиргенин өкмөттүн маалымат кызматы кабарлады.
Андан тышкары, COVID-19 пандемиясы шартында ар бир жаран өз жакындарынын өмүрү жана ден-соолугу үчүн социалдык жоопкерчиликти сезе билиши керек, бул коронавируска каршы биргелешкен күрөшкө анын салымы экендигин Министрлер Кабинетинин төрагасы баса белгиледи.
«Урматтуу жарандар, бүгүнкү күндө Министрлер Кабинети баардык массалык иш-чараларды өткөрүүнү кошпогондо, кандайдыр бир чектөөлөрдү киргизүүнү көздөбөйт. Ошону менен бирге, ар бирибиз жакындарыбыздын өмүрү жана ден-соолугу үчүн социалдык жоопкерчиликти сезе билишибиз керек. Бул коронавируска каршы биргелешкен күрөшкө биздин салымыбыз болот. 2020-жылдагы “кара июль” кандай болгондугун унута элекпиз. Бул кайгылуу окуялардын кайталанышын эч ким каалабайт. Ар бирибиздин ден-соолугу жөнөкөй санитардык ченемдерди сактоодон көз каранды. Өзүңүздүн жана жакыныңыздын өмүрүнө коркунуч келтирбеңиз, көп эл чогулган жерлерден алыс болуңуз, тойлорго жана башка ири иш-чараларга барууну чектеңиз», – деп Улукбек Марипов кыргызстандыктарга кайрылды.
