Кыргызстан Future Policy Award 2021 алтын сыйлыгына ээ болду

Химиялык заттарды жана таштандыларды коопсуз башкаруу жаатындагы баш мыйзам актылары Future Policy Award 2021 сыйлыгына ээ болду. Бул тууралуу Экономика министрлигинин маалымат кызматы кабарлады.

Аталган сыйлык көпчүлүк учурда мыкты саясаттын «Оскары» деп аталат жана ал химиялык заттардын адамдын ден соолугуна жана айлана-чөйрөгө тийгизген терс кесепеттерин минималдаштыруучу кыйла натыйжалуу саясий чечимдер үчүн берилет.

36 мамлекеттен көрсөтүлгөн 55 саясий чечимдердин ичинен алтынга татыктуу деп эки өлкө тандалды. 

1-Кыргызстан. КРнын Өкмөтүнүн 2015-жылдын 9-февралындагы №43 «Химиялык заттардын/аралашмалардын коопсуздугун классификациялоо системасы жана опурталдуулук жөнүндө маалымат берүүнүн элементтерине: маркалоого жана коопсуздук паспортуна талаптар жөнүндө жобону бекитүү тууралуу» токтому.

2-Швеция, Стокгольм. Курчап турган чөйрө жана адамдардын ден-соолугу үчүн коркунучтуу химикаттардын этап-этабы менен тизмеси (2012-2016-ж.ж., 2017-2021-ж.ж. кайра каралган).

Үстүбүздөгү жылдын 6-июлунда Future Policy Award 2021 конкурсунун жеңүүчүлөрү жогорку деңгээлдеги виртуалдык сыйлык тапшыруу аземинде, андан соң, 8-июльда Берлинде «Химиялык заттар жана туруктуу өнүгүү» форумунда сыйланат.