УБ кызматкерлеринин бир бөлүгүн аралыктан иштөөгө өткөрдү – COVID-19
Өлкөдөгү эпидемиологиялык кырдаалга байланыштуу КРнын Улуттук банкы 2021-жылдын 2-июлунан тартып кызматкерлеринин бир бөлүгүн аралыктан иштөө режимине өткөрүү чечимин кабыл алды. Бул тууралуу банктын маалымат кызматы кабарлады.
Өлкөдөгү эпидемиологиялык кырдаалга байланыштуу жана Өлкө аймагында COVID-19 коронавирус инфекциясынын жайылышын алдын алуу жана андан ары тарап кетүүсүнө бөгөт коюу боюнча республикалык штабдын сунуш-көрсөтмөлөрүнө таянып, КРнын Улуттук банкы 2021-жылдын 2-июлунан тартып кызматкерлеринин бир бөлүгүн аралыктан иштөө режимине өткөрүү чечимин кабыл алды.
Ошол эле учурда КРнын мыйзамдары менен белгиленген Улуттук банктын ыйгарым укуктарынын жана иш милдеттеринин үзгүлтүксүз аткарылышын камсыз кылган иш процесстери штаттык режимде иштеп жаткандыгын банктан маалымдашты.
Бирок COVID-19 коронавирус инфекциясынын жайылышына бөгөт коюу иш-чараларынын алкагында, Улуттук банкта жарандарды жеке кабыл алуу иши убактылуу токтотулду.
- Жарандардын кайрылуулары мыйзамда белгиленген тартипте каралат. Улуттук банктын ишине тиешелүү расмий маалымат www.nbkr.kg расмий интернет-сайтында жана социалдык тармактардагы расмий баракчаларында жайгаштырылган. Бардык суроолор менен mail@nbkr.kg электрондук почтасы же 0312 61 04 86 телефону аркылуу коомдук кабылдамага кайрылууну сунушталат.
