Бишкек шаарынын мэриясы «жашыл» акциясын баштады – жарандарды ысыкта бак-дарактарды суугарууга чакырды

Бишкек шаарынын мэриясы #Greenchallenge деп аталган «жашыл» акциясын баштады. Аба ырайынын кескин ысып баштаганына байланыштуу, жарандарды да шаардагы бак-дарактарды сугарууга чакырды. Бул тууралуу муниципалитеттин маалымат кызматы билдирди.  

«Урматтуу жарандар, учурда Бишкекте адаттагыдан да ысык күндөр болууда. Борбордук Азия региону, анын ичинде биздин өлкө сугат суусунун кескин тартыштыгын баштан кечирип жаткан убагы. Ушуга байланыштуу сизден суранаарыбыз, мүмкүн болушунча үйүңүздүн жанында өсүп турган бир бакты, көчөттү, бадалды сугарганга аракет кылыңыз. Биргелешкен аракеттердин натыйжасында гана биз сүйүктүү борборубузду гүлдөтө алабыз. Шаарыбыздын өнүгүшүнө өз салымыңызды кошуңуз!» – деп мэрия баш калаанын жашоочуларына кайрылды.  

Учурда аба ырайынын ыссык болуп жаткандыгына байланыштуу, борбор калаанын төрт акимиаты, Бишкек шаарынын мэриясынын бардык кызматтары сугат иштерине өзгөчө көңүл бурушууда.

Жашылдандыруу аянтчаларын сугаруу эртең менен саат 8.00-9.00дөн кечиктирилбестен же кечки саат 18.00-19.00дөн кийин жүргүзүлүшү керек.