ЕӨБ Кыргызстанга, Тажикстанга жана Арменияга инвестицияларын 500 млн долларга чейин көбөйтөт
Евразия Өнүктүрүү Банкы (ЭӨБ) миноритардык акционерлердин өлкөлөрүндө долбоордук ишмердүүлүгүн кеңейтип, Кыргызстан, Тажикстан жана Арменияга инвестициялардын жалпы көлөмүн 500 млн долларга жеткирет. Бул банктын кеңешинин кезектеги отурумунан кийин белгилүү болгонун Экономика министрлиги маалымдады.
Министрликтин маалыматы боюнча, региондун макроэкономикалык өзгөчөлүктөрүн эске алуу менен банктын мүчө өлкөлөрүнүн ар бири үчүн өзүнчө стратегияларды иштеп чыгуу пландаштырылууда.
ЕӨБдүн Кеңешинин отурумунда кабыл алынган негизги документтердин бири – банктын 2022-2026-жылдарга карата стратегиясы болгон. Жакынкы мезгилде каржы институту интеграциялык эффект менен чек арадагы инвестициялык долбоорлорду ишке ашырууга басым жасайт. Банктын беш жылдык жалпы инвестициясы 10.9 млрд долларды түзгөнүн министрликтин маалымат кызматы кабарлады.
Маалыматка ылайык, ЕӨБдүн иш-аракеттери «Европа – Батыш Кытай» транспорттук жана санариптик коридору, ЕАЭБ бирдиктүү товардык бөлүштүрүү тармагы + Борбор Азиянын суу-энергетикалык комплекси сыяктуу ири инвестициялык долбоорлорду ишке ашырууга багытталат.
