Ысык-Көлдөгү Корумду– Балбай Баатыр айлампа жолунун курулушу 128 млн долларга бааланды
Узундугу 81 чакырымды түзгөн Корумду – Балбай Баатыр унаа жолунун курулушунун жалпы наркы 128 млн долларга бааланды. Бул тууралуу Транспорт жана коммуникациялар министринин орун басары Нурланбек Кайынбаев бүгүн парламенттин транспорт, коммуникация, архитектура жана курулуш боюнча комитетинин отурумунда билдиргенин 24.kg маалымдады.
Берилген маалыматка ылайык, долбоор беш донор (ОПЕК, ИБР, Сауд өнүктүрүү фонду, Кувейт фонду жана Абу-Даби араб фонду) тарабынан каржыланат жана алардын ар биринин өзүнүн каражат бөлүү шарттары бар.
Жыйында депутат Калдарбек Баймуратов жолду бир катмарлуу кылып асфальттай турган болсо, каражат текке кетерин айтты.
«Ысык-Көл айлампа жолу бүтүшү керек. Бирок эч кандай нааразычылыктар болбошу үчүн чыгымдарга көңүл буруу керек. Комитет 128 млн доллар бөлүүгө макулдук берет, бирок кийинчерээк жолдун бир чакырымы эмнеге кымбат деген суроо болбош керек», – деди ал.
Транспорт жана коммуникациялар министринин орун басары Нурланбек Кайынбаев жолдо белгилер коюлуп жаткандыгын жана жумуш бир айдын ичинде бүтүшү күтүлүп жатканын белгиледи.
