Баалар асман чапчыды, бирок чечимдер күзгө калды – Соода өнөр-жай палатасында ишкердүүлүк боюнча комитеттин отуруму өттү
Кечээ, 6-июлда КРнын Соода өнөр-жай палатасында Агро өнөр-жай комплексинде жеке ишкердүүлүк жана кайра иштетүү өнөр-жайы Комитетинин биринчи отуруму болуп өттү. Бул тууралуу СӨПтүн маалымат кызматы кабарлады.
Отурумда Комитеттин мүчөлөрү азык-түлүккө баалардын 70-80 %га чейин өсүп кетишин жана өндүрүүчүлөр, кайра иштетүүчүлөр жана сатып алуучулар ортосунда баага баланстын жоктугун талкуулашты. Андан улам баалардын анализин жүргүзүп, аларды салык саясаты, калктын белгилүү катмарына жеңилдиктер, жарманкелер сыяктуу механизмдер аркылуу рыноктун бардык катышуучуларына ыңгайлуу болгон бир көрсөткүчкө алып келүү муктаждыгы белгиленди.
Берилген маалыматка ылайык, отурумдун катышуучулары эң курч суроолорду жана артыкчылык берилген багыттарды бир ай ичинде аныктап, күздө чогулуп, талкуулоону чечишти.
«Жеке ишкердүүлүктү өнүктүрүү фондунун» директорлор кеңешинин төрагасы Руслан Тагаев кошумчалагандай, жумушчу топ квартал сайын же андан тез убакыт сайын жолугуп, отурумдардын жыйынтыктары менен өз сунуштарын Министрлер Кабинетине, президенттин Аппаратына жана Айыл-чарба министрлигине жөнөтүп турат.
