Токтогул суу сактагычындагы суу мурдагы жылдарга салыштырмалуу кыйла аз – Энергетика министрлиги
Энергетика жана өнөр жай министринин орун басары Таалайбек Ибраев Токтогул, Үч-Коргон, Шамалды-Сай, Күрпсай ГЭСтериндеги жана Камбар-Ата-2 ГЭСиндеги даярдык иштеринин жүрүшү менен таанышты. Бул тууралуу министрликтин басма сөз кызматы билдирди.
Министрдин орун басары техникалык кызматкерлер менен кеңешме өткөрүп, Токтогул ГЭСин калыбына келтирүү иштери менен таанышты.
Министрлик учурда Токтогул суу сактагычындагы суунун деңгээли 11 млрд кубометрден ашканын билдирди. Бул өткөн жылдын ушул мезгилине салыштырмалуу бир кыйла төмөн.
Ошол эле учурда суунун деңгээли жаз мезгилине салыштырмалуу жогорулаган. Министрликтин алдын-ала божомолуна ылайык, 1-октябрга карата бул көрсөткүч 13.2 млрд кубометрге чейин көтөрүлөт.
Белгилей кетүүчү нерсе, Энергетика министрлигинин божомолу ишке ашса деле, суу сактагычтагы суунун көлөмү 2020-жылдын октябрь айына салыштырмалуу 2 млрд кубометрге аз болот.
Кыргызстан бир нече жылдан бери суунун жетишсиздиги көйгөйүн тартып келет. Токтогулдагы суунун азайышы менен байланышкан электр энергиясынын тартыштыгынан республика коңшулардан бул жаатта жардам алууга аргасыз болуп келет.
Буга байланыштуу Кыргызстан Өзбекстан жана Казакстан менен электр энергиясын алмашуу боюнча келишим түзүп, ошондой эле Түркмөнстандан электр жана газ жеткирүү боюнча макулдашты.
