Президент акы төлөп автоунаанын айнегин күңүрттөөгө уруксат берди
Президент Садыр Жапаров Акы төлөп унаа айнегин күңүрттөө жөнүндө Мыйзамга кол койду. Бул тууралуу өлкө башчынын маалымат кызматы билдирди.
«Мыйзамдын максаты – республикалык бюджетке салыктык эмес келип түшүүлөрдү көбөйтүү жана акы төлөө негизинде транспорт каражаттарынын ээлерине транспорт каражатынын алдыңкы эшиктердин каптал айнектерин күңүрттөөгө мыйзамдуу түрдө уруксат алуу мүмкүнчүлүгүн берүү. Башкача айтканда тартип бузуу, кылмыштуулуктун санын азайтуу менен бирге бюджетке түшчү акча каражатынын көлөмүн көбөйтүү болуп саналат», – деп айтылат билдирүүдө.
Эскерте кетсек, мындай демилгени Экономика министрлиги республикалык бюджетке салыктык эмес кирешелерди көбөйтүү максатында көтөрүп чыккан болчу.
Алымдын өлчөмү жана төлөө тартиби Министрлер кабинетинин чечими менен аныкталат. Бирок буга чейин анын баасы 50 миң сом өлчөмүндө болоору айтылып келген болчу.
Автоунаанын алдыңкы каптал айнектерин күңүрттөөгө уруксат Carcheck системасы аркылуу автоматтык түрдө берилет. Система төмөнкүдөй иштейт: төлөм жүргүзүлгөндөн кийин, арыз «Унаа» мамлекеттик мекемесине электрондук түрдө жөнөтүлөт жана каттоо ошол жерде жүргүзүлөт, ал автоматтык түрдө Carcheck тутумунда чагылдырылат. Андан кийин унаа ээси барып, айнектерин күңүрттөй берсе болот. Күңүрттөөчү материалдарга эч кандай талаптар жок. Бирок айып пулдары төлөнбөгөн унаа ээлерине айнегин күңүрттөөгө уруксат берилбейт.
