Жүргүзүлгөн аудиттин жыйынтыгында «Тазалык» дээрлик 140 млн сомду мыйзамсыз жок кылганы аныкталган
Акыркы жылдары «Тазалык» муниципалдык ишканасы дээрлик 140 млн сомдук мамлекетке каржылык зыян келтирген. Бул тууралуу «Тазалык» муниципалдык ишканасынын кызматкерлеринин митинги боюнча борбор калаанын мэриясы билдирди.
Белгилей кетсек, «Тазалык» МИнин айрым кызматкерлери шаардык кызматтын мурдагы жетекчисин кайра дайындоо талабы менен митингге чыгышкан.
Бирок, мурунку жетекчиликтин 2019-2020-жылдар аралыгындагы ишинин жүрүшүндө КРнын Эсеп палатасы жана Бишкек шаарынын мэриясынын Ички аудит башкармалыгы тарабынан жүргүзүлгөн аудитордук текшерүүлөрдүн жыйынтыгында мыйзам бузуулар аныкталган.
«Эсеп палатасынын текшерүүсүнүн жыйынтыгында абоненттер менен иштөөдө мыйзам бузуулар аныкталган – 7.3 млн сомдук зыян келтирилген. Ошондой эле, бекитилген сметада каралбаган тейлөө кызматкерлерине кошумча төлөмдөр боюнча 42.3 млн сомдук мыйзам бузуулар аныкталган. КРнын «Мамлекеттик сатып алуулар жөнүндө» мыйзамынын талаптарын бузулгандыктан дал келбеген сумма 35.3 млн сомду түзгөн.
Мындан тышкары, Бишкек шаарынын мэриясынын Ички аудит башкармалыгы тарабынан «Тазалык» МИнин 2019-2020-жылдар аралыгындагы финансылык-чарбалык ишмердүүлүгүнө аудит жүргүзүлгөн. Текшерүүнүн жыйынтыгы боюнча 54.8 млн сомдук мыйзам бузуулар аныкталган», – деп айтылат мэриянын берген маалыматында.
Анын ичинде:
- 25 793 900 сом – келишимдерди негизсиз түзүү, жасалма өткөрүлгөн конкурс, аванстык төлөмдөр жана башкалар
- 15 707 000 сом – муниципалдык заказдын эсебинен негизсиз сый акы акы төлөө
- 6 101 800 сом – күйүүчү-майлоочу материалдарды негизсиз эсептен чыгаруу
- 4 558 400 сом – негизсиз орнотулган жана иштен чыгарылган тетиктер
- 1 227 900 сом – товардык-материалдык баалуулуктардын жетишсиздиги
- 455 000 сом – каражаттарды негизсиз эсептен чыгаруу.
Бул текшерүүнүн жыйынтыгы боюнча материалдар юридикалык баа берүү жана зарыл чараларды көрүү үчүн тиешелүү укук коргоо органдарына жөнөтүлдү.
Ошондой эле борбор калаанын мэриясы «Тазалык» муниципалдык ишканасынын кызматкерлерин кызматтык милдеттерин аткарууга жана чагымчылдыкка алдырбоого чакырат.
