«Менин үйүм 2021-2026» – турак жайдын чарчы метринин максималдуу баасы 70 миң сомго көтөрүлдү
Министрлер кабинетинин төрагасынын биринчи орун басары Арзыбек Кожошев мамлекеттик турак-жай саясатын ишке ашырууну мониторингдөө боюнча Координациялык кеңештин жыйынын өткөргөнүн минкабдын маалымат кызматы билдирди.
Координациялык кеңештин жүрүшүндө ипотекалык насыянын жеткиликтүүлүгүн камсыздоо максатында «Менин үйүм 2021-2026» программасынын алкагында сатылып алынган турак жайлардын параметрлерин өзгөртүү маселеси каралды.
АКШ долларынын курсунун туруксуздугуна байланыштуу «Менин үйүм 2021-2026» программасына бир катар өзгөртүүлөрдү киргизилди. Ага ылайык, турак жайдын 1 чарчы метринин максималдуу баасы 60 миң сомдун ордуна 70 миң сомго чейин көтөрүлдү.
Ошол эле учурда, 1 чарчы метр үчүн максималдуу баа боюнча чектөөлөр акыркы 10 жылдын ичинде пайдаланууга берилген турак жайларга жайылтылбайт. Ошондой эле, алынган турак жай иштеген жеринен 60 км алыс эмес, же иштеген жери боюнча областтын административдик-аймактык чегинде жайгашуусу тийиш.
