Кыргызстан Эл аралык өнүктүрүү ассоциациясынан суу менен камсыздоону жакшыртуу үчүн 100 млн доллар алат
Эл аралык өнүктүрүү ассоциациясы (ЭӨА) Кыргызстан менен быйылкы жылдын 19-апрелинде Вашингтондо кол коюлган каржылоо келишиминин алкагында Климаттын өзгөрүшүнө туруктуу суу кызматтарын жакшыртуу долбооруна 100 млн доллар бөлөт.
27-июнда Жогорку Кеңештин Бюджет, экономикалык жана фискалдык саясат боюнча комитетинин жыйынында «2022-жыл 19-апрелинде Вашингтон шаарында кол коюлган КР менен Эл аралык өнүктүрүү ассоциациясынын ортосундагы «Климаттын өзгөрүүсүнө туруктуу суу чарба кызматтарын жакшыртуу» (кредит №7081-KG, грант №Е009-KG) долбоору боюнча каржылоо жөнүндө макулдашууну ратификациялоо тууралуу» мыйзам долбоору каралды.
Келишимде Эл аралык өнүктүрүү ассоциациясы тарабынан 50 млн доллар жеңилдетилген насыя жана IDA ресурстарынан 50 млн доллар грант каралган. Насыя 38 жылга, анын ичинде алты жылдык жеңилдетилген мезгилге, 32 жылга 0.75% менен берилет.
Долбоордун жалпы баасы 100 млн доллар.
Долбоорду ишке ашыруу мөөнөтү – 7 жыл, 2022-жылдан 2028-жылга чейин.
Долбоор төмөнкү аймактарда иштейт:
- Ысык-Көл облусундагы Кызыл-Суу, Бөкөнбаев жана Кажы-Сай айылдарындагы суу түтүктөрүн, канализацияны жана тазалоочу курулмаларды реабилитациялоо жана куруу;
- Баткен облусунда жалпысынан 38 айылдын үйлөрүн/короолорун туташтыруу менен жаңы суу түтүктөрү каржыланат;
- Ош, Баткен облустары жана Жалал-Абад облусунун бир бөлүгү жайгашкан үч иштеп жаткан ирригациялык жана дренаждык системаларды реабилитациялоону каржылайт. Үч ирригациялык система 23 суу пайдалануучулар ассоциациясынын карамагындагы жалпы аянты 28 миң га айыл чарба жерлерин суу менен камсыз кылат.
