Парламентте мыйзам бузган эмгек мигранттарынын көйгөйлөрү талкууланды
Жогорку Кеңештеги «Ыйман Нуру» фракциясынын депутаттары кечээ, 28-июнда, мыйзам бузган эмгек мигранттарынын көйгөйлөрүн талкуулашты. Бул тууралуу Жогорку Кеңештин басма сөз кызматы билдирди.
Жыйынга лидер Нуржигит Кадырбеков баштаган фракция мүчөлөрү, тиешелүү министрликтердин жана жарандык коомдун өкүлдөрү катышты.
Баңги кылмышына аралашкан жарандардын энелери жаштар алдамчылыктын курмандыгы болуп жатканын белгилешүүдө. «Татарстанда эле 20га жакын мекендешибиз түрмөдө отурат. Бул айда 15 бала соттолду. Элчилик адвокат гана жөнөтүп, башка жардам көрсөтө алган жок», – дешип, элчиликтин имаратына кирүү да абдан кыйын экенин кошумчалашты.
Талкууда Тышкы иштер министринин орун басары Азизбек Мадмаров Россиядагы мекендештер арасында административдик укук бузуулардын саны 2020-жылга салыштырмалуу 1.5 эсеге көбөйгөнүн белгиледи. «Негизги себептер бул: өлкөгө кирүү жана чыгуу режимин бузуу, бейбаштык, алкоголдук ичимдиктерди ичүү жана баңгизаттарын колдонуу», – деп түшүндүрдү ал.
Акыйкатчы институтунун аппарат жетекчиси Аскат Азарбеков билдиргендей, учурда Россияда 985 адам камакта. «Алардын 30%ы баңгизаттын айынан түзөтүү абагына камалган. Учурда талдоо иштери жүрүп жатат. Абактагылардын көбү оңой акча табам деп алданып калган», – деди Азарбеков.
Депутат Султанбай Айжигитов КР күч түзүмдөрүнүн Россиядагы өкүлчүлүктөрүн активдүү иштөөгө чакырды. Анын пикиринде, бул маселени чечүү үчүн комплекстүү иштеш керек. Кылмыштарды тергөө процессине Кыргызстандын өкүлдөрү тартылышы керек, кармалган учурдан тартып, бардык процессуалдык эрежелер сакталышы керек.
Мындан тышкары, депутат Динара Ашимова Түркия, Сирия сыяктуу өлкөлөрдө кармалган аялдарга байланыштуу маселени карап чыгуу зарылдыгын айтып, эл аралык конвенциялардын алкагында мыйзамдык базаны бекемдөөнүн маанилүүлүгүн белгиледи.
Ошондой эле, жыйындын катышуучулары тарабынан алданып, кылмыштуулукка аралашкан жарандарга жардам көрсөтүү, мындай окуялардын алдын алуу жана тиешелүү мыйзамдарга өзгөртүү киргизүү боюнча сунуштар айтылды.
