Кыргызстан насыяларын төлөбөсө, Бишкек ТЭЦи, «Датка-Кемин» жана «Түндүк-Түштүк» жолу башкаларга өтүп кетет - Акылбек Жапаров
Кыргызстан тышкы насыяларды төлөбөсө, Бишкек ТЭЦи, “Датка-Кемин” электр чубалгысы жана “Түндүк-Түштүк” жолу бөлөктөрдүн колуна өтүп кетет. Бул тууралуу кечээ, 29-июнда, Жогорку Кеңештин жыйынында 2022-жылдын биринчи жарым жылдыгында аткарылган иштер боюнча министрлер кабинетинин маалыматын кароодо минкаб башчысы Акылбек Жапаров билдирди.
Жыйында минкаб башчысы мамлекеттик карызды төлөбөсөк, кандай тобокелдиктер бар экенин эске салды, деп билдирет «Азаттык» радиосу.
Анын айтымында, 2023-жылдан 2028-жылга чейин жыл сайын 400 млн доллардан 460 млн долларга чейин төлөп туруу зарыл, анын 80%дан ашыгы – тышкы карыз.
«Эмне үчүн бюджетти көбөйтүү зарылдыгын айтып жатабыз? Анткени жакынкы 5 жылда мамлекеттик карызды төлөөгө 35 млрд сомдон 50 млрд сомго чейин бөлүшүбүз керек. Тышкы карызыбыздын 50%дан ашыгын Кытайдын Эксимбанкына төлөшүбүз керек. Ошондуктан кийинки 5 жылда кайсыл каражаттардан төлөшүбүздү ойлонушубуз керек.
Мен муну коркутуу үчүн айтып жаткан жокмун, бирок акчаны төлөй албасак, анда Бишкек ТЭЦи, “Датка-Кемин”, “Түндүк-Түштүк” жолу сыяктуу объектилерди башкаруу бөлөк адамдардын колуна өтүп кетет. Тагыраак айтсак, Эксимбанк тандаган башкаруучу компаниянын колуна өтөт», – деди Жапаров.
